Sərginin kuratoru Tərlan Manafov əsrlər arası dialoqun vacibliyini vurğulayaraq deyir: “Sərgimizdə siz Qobustan kodlarında əks olunan bəşəriyyətin mənşəyinin sirlərinə qərq olacaqsınız. Odur ki, insanı və yaradıcılıq ruhunu yaradan sənət bəşəriyyəti böhrandan çıxarmağa qadirdir!”

“Qobustanın Kodları” sərgisinin mühüm tərkib hissəsi Toğrul Avşarın Azərbaycanın qüdrətli məkanları olan Qobustanda çəkdiyi filmdir.
Sərginin daha bir vacib hissəsi – Nigar Həsənzadənin yaratdığı “SÖZ” adlı bədii layihənin çərçivəsində əməkdar və xalq artistlərin iştirakı ilə poetik tamaşa təqdim olunacaq.

Bu layihə çərçivəsində Nine Senses İncəsənət Mərkəzi mövzuya uyğun fərqli proqramlar keçirəcək:

• Dəvət olunmuş tarixçi, ölkəşünas və antropoloqların iştirakı ilə Qobustan mövzusunda dairəvi masa tədqiqat müzakirələri;
• Fotoqraf və rejissor İlkin Zəfərlinin “Qobustan-3029” bədii dioraması;
• “Qobustan uşaqların gözü ilə – mühazirələr və ustad dərsləri” layihəsi həm uşaqlar, həm də böyüklər üçün nəzərdə tutulmuş, hər kəsə bu qədim torpağın tarixi irsi ilə təmasda olmaq imkanı verir.

Sərgi Noyabrın 10-dan etibarən “Nine Senses” incəsənət mərkəzində açıq və pulsuz olaraq ziyarətçilərə təqdim olunacaq. O, geniş auditoriyaya yönəlib, bilik və qüdrətin insan vasitəsilə ötürüldüyünü göstərərək, insan təbiətinin və incəsənətin dərin aspektləri barədə düşünməyə təşviq edir.

Nine Senses — yaradıcılıq və özünüinkişaf üçün incəsənət mərkəzi Xəzər dənizinin sahilində yerləşən, xoş təəssürat yaradan bir məkandır. Mərkəzin missiyası bütün yaş və peşələrdən olan sənətsevərlər üçün təhlükəsiz və ahəngdar ictimai məkan yaratmaqdır. Burada hər kəsin daxilində yaradıcı və əyləncəli ruhun ortaya çıxmasına inanırlar.

AZBRAND — 2018-ci ildən Azərbaycan bazarında fəaliyyət göstərən özəl şirkətidir.
Şirkət “Made in Azerbaijan” proqramı çərçivəsində Azərbaycan istehsalçılarının xarici bazarlara düzgün çıxışı ilə bağlı məsləhət xidmətlərini uğurla həyata keçirir, Azərbaycan istehsalçılarının məhsullarının brendləşdirilməsi və müştərilərə bazarda davranış strategiyaları qurmaq üçün biznes mühitinin tam analizinə əsaslanan strategiyalar hazırlamaq sahəsində uğurla fəaliyyət göstərir.

Tarlan Manafov — Qobustanlı irsi şaman, həyatını ərazinin müqəddəs kodlarının tədqiqatına həsr etmişdir. Onun əcdadları sufilər olmuş və o, dünyanı gəzməklə, bir çox müqəddəs məktəblərdə təlim keçmişdir. İndi Tərlan qədim ənənələri müasir tədqiqatlarla birləşdirərək Qobustan Müqəddəs Azərbaycan Mərkəzini bərpa edir.

Toğrul Avşar – aero foto-video çəkiliş ustası, Azərbaycanın mənzərəli yerlərini, qədim tarixini, memarlığını və mədəni irsini dünyaya göstərən rejissordur. Onun obyektivindən ölkə öz gözəlliyi ilə canlanır, hər bir kadr doğma torpağa sevgi və ehtiramla dolur. Toğrul Azərbaycanın bənzərsiz mənzərələrini quş uçuşu yüksəkliyindən göstərməyə çalışır, insanlara bu ölkənin dərinliyini və əzəmətini hiss etmək üçün zaman və məkanda maraqlı səyahətə çıxarır.

Ekoloji fəlakət barədə saysız-hesabsız xəbərdarlıqlara baxmayaraq, bəşəriyyət yenə də planeti böhrandan xilas edə bilmədi və nəticədə burada həyat mümkünsüz oldu.

İnsanlar yeni bir ev axtarışında kosmosun sonsuz dərinliklərinə yola düşdülər.

Əsrlər keçdi və planetimizi yaşamsız vəziyyətə gətirən plastik üzvi forma alaraq böyüyüb çoxalan özünəməxsus flora yaratdı.

3029-cu il. Daşlı səthə bir kosmik gəmi enir və 24 yaşlı Azər oradan çıxır. O, bir vaxtlar ölkəsinin, planetinin yerləşdiyi, yalnız dərsliklərdən və əsrlər öncə çəkilmiş qədim fotoşəkillərdən tanıdığı bir yerə geri dönüb.

O, yeni və maraqlı plastik bitkilərlə əhatə olunmuş Qobustanda yerə enib. Azər əlini qaldıraraq tarixə salam verir.

Gəlin, evimizin həmişə ev olaraq qalması üçün bu günümüzü qoruyaq.

İlkin Zəfərli
dioramanın müəllifi, rejissor, fotoqraf